相信東京迪士尼樂園、東京迪士尼海洋係唔少人去東京旅行時嘅必去景點,無論大人定小朋友去都會玩到樂而忘返。適逢今年係開幕四十週年,東京迪士尼將會舉辦一系列嘅慶祝活動,例如「Disney Harmony In Color」日間花車巡遊,仲有其他期間限定活動,例如瘋狂濕身嘅夏季慶典!小編為大家整合咗2024年東京迪士尼樂園、東京迪士尼海洋嘅表演以及活動,一齊睇下黎緊有咩玩啦!想知道門票詳情、交通方法,可以去睇東京迪士尼攻略!如果係去大阪嘅話,可以睇下日本環球影城2023活動整合!
目錄
【Space Mountain告別活動】
東京迪士尼嘅人氣遊樂設施Space Mountain「太空山」,將於今年8月1日起關閉大翻新,喺2027年先會再次開放。翻新後仍然會係室內過山車,但係會加上新嘅特效,令體驗更加刺激。而「太空山」嘅室外周邊環境都會關閉及進行更新。官方將於4月9日至7月31日舉行告別活動,「太空山」門口將設有「The Final Ignition!」標語、拍照點俾大家打卡。另外,亦有主題飲品、爆谷、以員工制服做設計嘅鎖匙扣及其他周邊商品。而活動期間只要遊玩「太空山」仲可以獲得紀念貼紙!鍾意「太空山」嘅話一定要喺8月之前去同佢道別啦!
【新酒店Tokyo DisneySea Fantasy Springs Hotel 24年6月開幕】
東京迪士尼下年會有新酒店啊!
隨著東京迪士尼海洋新園區「Fantasy Springs」即將於2024年春天開幕,日本迪士尼宣佈,新酒店「Tokyo DisneySea Fantasy Springs Hotel」亦會喺2024年6月6日開始營業!新酒店有9層高,位於「Fantasy Springs」園區內,一共有475間客房。房間內嘅牆紙、花卉圖案設計靈感來自《魔髮奇緣》、《小鹿斑比》等迪士尼電影作品。酒店將於2024年2月8日起開放預約,如果有興趣入住,記得mark低呢個日期!
【新園區Fantasy Springs 24年春天開幕】
東京迪士尼海洋 (Tokyo Disneysea) 嘅新園區「Fantasy Springs」預計於2024年春天開幕!園區將以「魔法奇緣」(Tangeld)、「冰雪奇緣」(Frozen)、「小飛俠」(Peter Pan) 為三大主題。近日官方發布最新影片,公開園區部分真實面貌,從片段中可見「魔法奇緣」嘅高塔還原度極高!至於「冰雪奇緣」區,唔知東京呢個靚啲定係香港嗰個靚啲呢?新園區佔地14萬平方米,係東京迪士尼海洋嘅第八個園區,好期待啊!
【Priority Pass7月226日起期間限定免費】
東京迪士尼喺7月26日起啟用Priority Pass,適用於東京迪士尼樂園、東京迪士尼海洋一共14個遊樂設施。性質同以前嘅Fast Pass大同小異,不過就唔係實體嘅,而係入場後,喺東京迪士尼度假區官方App以先到先得形式獲得,而且唔可以自行選擇時間,只能喺被安排嘅指定時段入場。目前Priority Pass係期間限定免費,未知道之後會唔會收費。大家想用嘅話記得預先下載定官方App啦!詳細使用方法可以去東京迪士尼攻略睇!
【一日門票於23年10月起加價】
東京迪士尼將於10月起加價,開業40年以來,一日票首次突破10,000日圓!
東京迪士尼採用「變動價格制」,根據平日/假日、淡季/旺季等因素決定當日嘅票價,現時一日成人門票嘅價格區間分別係7,900日圓 (約$431)、8,400日圓 (約$459)、8,900日圓 (約$486)、9,400日圓 (約$513)。而喺今年10月起,將會新增9,900日圓 (約$540) 以及10,900日圓 (約$595) 票價。換句話說,最平嘅日子依然係7,900日圓,但係最貴嘅日子就會升到10,900日圓。
不過就算加價後,東京迪士尼最貴嘅門票都仲係平過香港迪士尼 (現時香港迪士尼普通日子成人門票為$639,特定高峰日子門票為$759),所以今次加價應該無阻大家去東京迪士尼嘅意欲嘅?
【東京迪士尼海洋——全新夜間匯演】
東京迪士尼海洋Tokyo DisneySea 由2022年11月11日開始有全新嘅夜間匯演《堅信!~夢想之海~》!( “Believe! Sea of Dreams”;「ビリーヴ!~シー・オブ・ドリームス~」) 除咗會有大型船隻喺海上面演出之外,呢個表演將會透過雷射光線、特效煙火等等嘅技術呈現迪士尼明星憑藉永不放棄、堅信希望嘅力量,最終實現夢想嘅精彩歷程。「地中海港灣」嘅建築物上面仲會佈滿光雕投影,相信一定會係一場視覺饗宴。呢個夜間匯演暫時未有結束日期,相信仲會維持一段時間,去東京玩嘅話一定唔可以錯過!
東京迪士尼樂園
- 地址: 千葉県浦安市舞浜1-1 (地圖)
- 電話:+81 453-305-211
- 東京迪士尼樂園官方網站
東京迪士尼海洋
- 地址: 千葉県浦安市舞浜1-13 (地圖)
- 電話:+81 570-008-632
- 東京迪士尼海洋官方網站
除咗東京迪士尼之外,仲可以留意埋其他日本各地嘅景點以及最新旅遊資訊!東京羽田機場旁邊嘅「羽田機場花園」(Haneda Airport Garden)終於喺2023年1月31日開幕!今次有 日本菇菇菇@JAPANGoGoGo3 嘅熱菇同朱菇拉帶路,睇下呢度有咩設施!呢度除咗有食店同商店,仲有2間高級酒店、天然溫泉、仲有直通日本各地嘅巴士總站,啱晒上機前最後血拼!
▼飛東京羽田機場必睇✈️直擊羽田機場花園開幕日🎉|一次過買手信、食名店、浸溫泉♨️|直通巴士可以去邊?🚌
喺大阪想去Outlet 終於唔使去臨空城啦!今次Claudia同Mayu會帶大家去大阪門真市新開嘅Lalaport同三井Outlet,呢度一共有成二百五十幾間舖頭咁多!而且商場入面仲有一個黑門市場、角落生物遊樂場,仲唔係最新食買玩最強商場?!
▼第二個黑門市場?🏮大阪終於有新Outlet🛍梅田出發唔使半個鐘!一片睇曬人氣牌子Outlet價+開幕優惠!💰